O acollemento civil non produce efectos legais nin presupón privilexio algún ou preferencia do neno ou nena acollido no acceso aos servizos municipais.

Estes actos de benvida á comunidade reafirman o compromiso do municipio por avanzar cara unha sociedade máis libre, xusta e democrática, na que os dereitos dos nenos gocen dunha protección preferente.

Este acto social está dirixido aos nenos e nenas do concello de Oleiros.

a) Estar empadroado no concello de Oleiros.

b) Non ter unha idade superior a dous (02) anos.

c) Consentimento dos representantes legais do menor.

Presentación dunha instancia na Oficina de Atención ao Cidadán do Concello solicitando a participación no acto social asinada polo representante legal do menor, achegando unha fotocopia dos documentos nacionais de identidade e do libro de familia/ documento acreditativo da dita representación legal. A acreditación dos datos padroais farase de oficio polos servizos municipais.

Se a instancia non reunira todos os requisitos, a Oficina de Atención ao Cidadán comunicará aos interesados a non procedencia da súa tramitación. De estar completa tramitarase a petición, comunicándose no termo dun mes ao solicitante o día e o lugar de celebración do acto.

Os pais poderán designar dúas persoas como máximo que actuarán como padriños na cerimonia, asumindo os mesmos compromisos que aqueles en canto a formación do neno ou nena nos principios e valores democráticos, e debendo velar polo respecto dos seus dereitos.

No acto de celebración, que terá lugar na Casa Charry e será presidido polo alcalde/sa ou concelleiro/a en quen delegue, procederase á lectura ao neno/a e aos seus representantes legais e padriños da Declaración dos dereitos do neno proclamada pola Asemblea Xeral das Nacións Unidas na súa resolución 1386 (XIV), de 20 de novembro de 1959.

Os representantes legais e padriños formularán compromiso de educalo/a segundo os principios que se recollen nese texto e nas demais normas vixentes no estado español.

Os actos poderán ser individuais ou colectivos, podendo asistir os familiares e amigos/as do neno ou nena, coas únicas limitacións que impoña o aforo da sala ou espazo no que se realice a cerimonia.

O presidente/a levantará acta, que será asinada polos representantes legais do neno ou nena e, no seu caso, polos padriños.

Esta normativa entrará en vigor unha vez publicado o seu texto completo no Boletín Oficial da Provincia, e transcorrido o prazo sinalado no artigo 65.2 en relación co 70.2 ámbolos dous da Lei 7/1985, de 2 de abril, Reguladora das Bases do Réxime Local.”

Oleiros, 17 de decembro de 2008

Fonte Boletín Nº 4. MiÉrcoles, 7 de enero de 2009